Oleh: MAS GAMPANG PRAWOTO BOJONEGORO
PRIYA UTAMA
Bingah jroning nala
Ambal warsa kang kebak donga
Mangayubagya tansah rinengga
Bombong sesolah jagading sastra
Ambeg budi bawa kaksana
Nut tata titi laksanane agama
Gumregah cancut taliwanda.
Baca Juga: Puisi Radar Bojonegoro: Oleh Susanto
Puguh ing budi daya
Rasa rinasa olahing rasa
Ijo abang kuning iku ming warna
Jenjem sajroning batin nira
Obah jumangkah nut ing kersa
Hurip piguna mring sapadha
Urupe pepadhang arupa cahya
Titah tumitah sawanthah jalma
Oyot ing bumi nyempulur ing akasa
Mobah mosik sang hyang sukma
Obahku lan obahmu atunggal jiwangga.
Tuban, 13/06/2026
JANTURAN RESI SUNAWAN
Inggih bapa Resi
Awit gesang punika wonten teges kang kapasang
Awon pasanganganipun sae, Susah pasanganipun seneng
Awit gesang punika namung urip kang ateges arep murih ing pangarep sedaya kadadosan ingkang dereng sumurup menawi dereng kalampahan sajrone laku lumaku dene luku lan garu.
Baca Juga: Puisi: Oleh Suharsono
Luku : urip kedah lumaku nut ing landhepe keji lan jerone taen-taen singkalan
Garu: garis kang katiru, ngrataake kang saru, aja nganti kesandhung ing dalan kang rata.
Ning kabeh isih gumantung saka rosaning sapi
lan kebo kang nggeret lan enggoke sing nglakokake luku
Kamangka
Hisjak, go, her, wis ilang saka pranatan gesang
Keluh lan tampar sandhetan ilang kalindhes jaman
Baca Juga: Puisi: Karya Malik Ibnu Zaman
Purwasari, 24/06/2026
JALA IWAK
Urip iku urup
kang duweni karep ora puges
kayadene damar kang kasatan patra.
Urip iku gesang
kang tansah setya tuhu
mring uripe dhewe, ora tansah nggesang
kanthi adhong njalasutra kabisane liyan.
Urip nora ming nggodhong lampes
kadidena jala kang mepes lan numpes
lakune iwak-iwak
ing weninging banyu
seneng mungguhing tukang jala,
marem ing gawe rubeda, ning gawe tuna
mring lestari ing jagading mina.
Baca Juga: PUISI: Oleh Susanto Guru SMP Negeri 1 Baureno.
Djambon,24/04/2026
REMBANG
mung bisa nyawang
saka kadohan bengesmu branang
pipimu kang mempluk nyemburat abang
jembare segara gawe rasaku mblandrang
ya kala-kala kerem ya kala-kala kambang
mung bisa nyawang
sawalike kudhung rasaku was sumelang
prau lan praupan saya nengah nglambrang
yogene ombak gedhe sanalika nrajang
gawe atiku kadlarang-dlarang.
Baca Juga: PUISI: Oleh Susanto Guru SMP Negeri 1 Baureno.
Rembang, 22/04/2026
SEGA BEBEK
bukak pora mbak
aku saiki ngajak sanak
sing awake krasa ora kepenak
malah kapara atine rinasa suwak
saka tembung lan ukara kang nyangklak
jare wis ora ketunggon sisihan lan anak
pancen ukara bisa endah kaya lar merak
sakala landhep kadidene wulu landhak.
bukak porak mbak
jare pengin sega bebek sing nyantak
sambel lombok mentah pedhes nyegrak
teh panas githel gawe awak semiyak
dhasar bakule ayu grapyak tur nyemanak
rasa lugrah sakala bisa mruntus ndadak
pancen urip iku ming ngetut suku tindak
among rasa, nata ati ing laku tumindak.
Kwiled, 23/04/2026
Editor : Farhan Reza Ardiansyah